RUTA FEHA COL G.M. LA PEÑUCA DE XIXÓN
El coordianor de la ruta ye : Albino
Riscando l'alba en Xixón.Cielu azul y.....
.....dos grados de temperatura.Fai un cutu qu'escarabaya'l pelleyu.A estes hores de la mañana,pinga'l mocu y corta'l mexu.
La ruta de güei,entama en Almurfe.Salimos del autobús,punsímonos toes les capes de ropa,......
.......coyimos la mochila,los bastones y.......
....entamamos la marcha pa la Xerra de La Cabra.
Pasamos al llau d'una panera y....
....coyemos la xenda que nos marca'l mapa.
Un árbol cayíu,córtanos el pasu.Tenemos que furar per baxu.
Salimos a campu abiertu.
Al Este,tenemos la Xerra de Bustariega,col Picu Castru y el Picu Monegru.
Les Peñes del Castru (semeya de Magín)
Llegamos a Les Fontes.
Agora el camín pose pindiu,pindiu.
....y allí taremos toes y toos contigo.Xubiendo per CAMINOS PINDIOS,pa
llegar al cumal.Sufriendo y esfrutando la montaña.Con les BOTES
GASTAES,pero enllenes d'alcordances,de vivencies,d'emociones.De momentos
perguapos,prestosos,irrepetibles.La llegada'l cumal,l'abrazu de cume,el momentu de la
xinta,la semeya de grupo,un brincu d'allegria,el conceyu al final de la
ruta,.......Eso ye la MONTAÑA y préstate tanto,que lo lleves grabao na piel.¡¡Puxa la bona xente montañera!!
Facemos una paraduca,p'alendar.
Entramos nuna viesca de fayes y dalgún qu'otru carrascu.
Pisamos la primera nieve del día.
Los árboles crecen,faciendo.....
.....figures estrañes.
De xuru,qu'esta viesca ta encantada.Xanes,ayalgues,trasgos,busgosos,diaños,.......
.....están escuendíos,vixilando los nuesos pasos.
¡¡¡¡Que mieuuuuu!!!!
Axenos a les miraes de los habitantes de la viesca,seguimos camín.
Abaxu,vemos el pueblu de Cuevas.
Defrente,la Xerra de la Cabra col Picu Gamonalín,onde queremos dir.
Seguimos camín,columbramos agora,......
.....la parte mas oriental de la Xerra de la Cabra,col Picu de la Cabra,el primeru de los cumales que queremos facer.
Llegamos agora,a les Cabañes de Bringales.
Cabañes de Bringales.
Pasamos tamién,al llau de la Braña de Cueva,onde.....
.....facemos una paraduca pa rexuntanos.
Semeya de Magín.
Seguimos camín.
Abaxu vamos dexando la Braña de Cuevas.
Seguimos xubiendo.
Ya vemos el cumal del Picu de la Cabra.
Al Norte,tenemos la Xerra de la Manteca,col Picu Urru.
El coordinaor.
La última parte del cumal,ye zona yerbosa.
El coordinaor,nel cumal del Picu de la Cabra.
Semeya de grupo.
Colamos del picu.Vamos buscar un sitiu afayadizu pa facer la xinta.De frente tenemos la Peña'l Diente y la Fana.
Baxamos per una llingua de nieve,......
.....entre la maleza.
Atopamos abellugu,entre.....
....unos peñascos.El sol péganos nel focicu y ye prestoso.
l'Utre,otia desde'l cielu.Seguro que tien fame.
Antes de colar,facemos les semeyes de grupo.Llevantamos les manes,porque tamos esfrutando y pasándolo perbién.
Esta ye la semeya de les peñuques,que tamién.....
...llevanten les manes.
Dempués de la xinta,colamos pa un mirador onde se columbra la Fana de Xinastaza
La Fana de Xinistaza.
Fana: Argayu "vivu".Que la tierra ta desmoronándose de seguíu.
Esti fenómenu xeolóxicu (que n'Asturies llámase Fana),na zona de Xinestaza,creo qu'entamó nel siglu XIX
Colamos del mirador.Xubimos per una pala de nieve,qu'en dellos sitios.....
....taba dura y daquién pegó un culazu "prestosu".
Volvemos a metenos per maleza,con.....
....llingües de nieve en dalgunos sitios.
La nieve está en bones condiciones y.....
...ye prestoso pisala.
Tamién pasamos per una llera.
Llegamos al Picu Gamonalín (1441m)
Atrás,vemos parte de camín recorríu.
Dempués d'unos momentos nel Gamonalín,......
...colamos.El tiempu pasa y nun queremos que se nos faga de nueche pel monte.
Metémonos per una pequeña viesca,con.....
....árboles enllenos de líquenes.Nesta zona,l'aire ye puru.
Baxamos con cuidao,per una pendiente con nieve dura.
Los cabezaleros espérennos abaxu
Rexuntámonos y....
...colamos toos xuntos.
Pasamos al llau les cabañes del Prau'l Galleru.
Vemos el pueblu de Noceda.
Sin pasar per Noceda,coyemos la carretera que baxa a Cuevas y Agüesmestes,onde espéranos l'autobús.
El Ríu les Cueves baxa bravu y....
....forma perguapes cascaes en dellos sitios.Mécese col Pigüeña en Agüesmestes.
Llegamos al pueblu de Cuevas.
Cuevas.
l'Agua baxa per cualquier llau.
Entramos nel pueblu y.....
...topámonos con la pila'l cuchu.El CUCHU yel meyor abonu del mundu.Natural,sanu y ecolóxicu.Ta fechu de boñica y mexu de vaca,mecío con restos de la yerba que s'emplega pa estrar.Too ello,fermentao.Con esti abonu,cosénchense los meyores productos de la güerta. ¡¡¡CONSUME PRODUCTOS ASTURIANOS,LOS MEYORES Y LOS MAS SANOS!!!
Concentración d'horros,en medio'l pueblu.
Llegamos a Agüesmestes.Ya vemos l'autobús.
Nel cielu,la lluna ta creciendo y......
...na tierra,les peñuques y peñucos,nel chigre bebiendo.
Güei por fín,vimos un osu..........nun cartel,apegau na paré del chigre.Algo ......ye algo.
LES SIGUIENTES SEMEYES SON DE MARI LLUZ,COORDINAORA DE LA RUTA ALTERNATIVA
ASTURIES 2018.TRIPLE ANIVERSARIU
Centenariu de la coronación de La Santina - 1.300 años del orixen del Reinu d'Asturies - Centenariu de la creación del Parque Nacional de la Montaña de Cuadonga.
